admin_wp

2025 жылы 18 қараша күні Қазақ ұлттық қыздар педагогикалық университетінде «Таза Қазақстан» республикалық экологиялық акциясын қолдау мақсатында сенбілік ұйымдастырылды. Іс-шараға университеттің белсенді студенттері, еріктілер тобы және оқытушылары қатысты.

Акцияның басты мақсаты – еліміздегі экологиялық саясатты қолдау, қоғамда табиғатқа жанашырлықпен қарау мәдениетін қалыптастыру және жастардың туған ортаны қорғауға деген жауапкершілігін арттыру. Сенбілік барысында қатысушылар университет аумағын, спорт және демалыс алаңдарын, сондай-ақ жақын орналасқан қоғамдық орындарды тазалап, жиналған қоқысты арнайы сұрыптау арқылы ретке келтірді.

Университет басшылығы алдағы уақытта да экологиялық мәдениетті нығайтуға бағытталған іс-шараларды тұрақты түрде өткізіп отырмақ. QyzPU экологияға қатысты игі бастамаларды қолдап, жастардың табиғатқа жанашыр көзқарасын дамытуға ерекше мән береді.

Қазақ ұлттық қыздар педагогикалық университетінің Менталды денсаулықты дамыту орталығының ұйымдастыруымен «Студенттердің деструктивті мінез-құлқын алдын ала анықтау» тақырыбында эдвайзерлермен кездесу өтті. Іс-шараны орталықтың психотерапевті Каримова Раушан Бидалиевна жүргізді.

Кездесудің басты мақсаты – эдвайзерлердің студенттердің деструктивті мінез-құлқын ерте кезеңде анықтау және алдын алу дағдыларын жетілдіру, сондай-ақ психологиялық қолдау көрсетудің тиімді тәсілдерін талқылау болды.

Шара барысында мамандар студенттердің мінез-құлық ерекшеліктерін бақылау, қауіпті белгілерді тану және эмоционалды күйзеліс жағдайында дұрыс әрекет ету жолдары жөнінде тәжірибе алмасты. Эдвайзерлер нақты өмірлік мысалдар мен интерактивті жаттығулар арқылы студенттермен тиімді жұмыс жүргізудің амалдарын меңгерді. Мұндай кездесулер эдвайзерлердің кәсіби құзыреттілігін нығайтып қана қоймай, оқу орнында қауіпсіз әрі қолайлы білім беру ортасын қалыптастыруға ықпал етеді.

Сонымен қатар, психологтар қатысушыларға деструктивті мінез-құлықтың алдын алу, сенімді қарым-қатынас орнату және студенттердің психоэмоционалды тұрақтылығын сақтау бағытында пайдалы кеңестер берді.

Аталған іс-шара БҰҰ-ның Тұрақты даму мақсаттарының бірі – ТДМ 3 «Денсаулық және амандық» бағытын іске асыру шеңберінде өткізілді.

Қазақ ұлттық қыздар педагогикалық университетінде 5 қараша күні Қыздар көшбасшылығы мен кәсіпкерлік орталығының ұйымдастыруымен «Арман Дала» демалыс лагерінің тәлімгерлері білім алушылармен арнайы кездесу өткізеді.

Мақсаты – білім алушылардың педагогикалық шеберлігін арттыруға, көшбасшылық және шығармашылық қабілеттерін дамытуға жағдай жасау. Сондай-ақ БҰҰ-ның Тұрақты даму мақсаттарының (ЦУР) 4-мақсаты – «Сапалы білім» және 8-мақсаты – «Жақсы жұмыс пен экономикалық өсу» аясында білім мен еңбектің үйлесімді байланысын нығайту арқылы болашақ мамандардың кәсіби әлеуетін көтеру.

Бұл кездесу – болашақ педагогтар үшін кәсіби тәжірибе мен тұлғалық дамудың жаңа мүмкіндігі. 2022 жылдан бері университет студенттері «Арман Дала» ұжымымен бірлесе отырып, қысқы және жазғы маусымдарда тәлімгерлік қызмет атқарып келеді. Осы уақыт аралығында студенттер білім беру үдерісін ұйымдастыру, балалар психологиясын түсіну және көшбасшылық дағдыларын дамыту бағытында құнды тәжірибе жинақтаған.

Биылғы ынтымақтастық жаңа серпінмен жалғасып, мазмұны жаңаша сипат алады. Кездесу барысында студенттерге лагерь ұсынған жаңашыл жобалар таныстырылып, алдағы бірлескен бастамалар талқыланады.

Өтетін күні: 5 қараша 2025 жыл
Уақыты: 15:00–16:00
Өтетін орны: Акт залы

Қыздар көшбасшылығы мен кәсіпкерлік орталығы білім, тәрбие және кәсіпкерлікті ұштастыра отырып, заманауи педагогтардың әлеуетін ашуға бағытталған жобаларды қолдауды жалғастырады.

Қазақ ұлттық қыздар педагогикалық университетінің №6 студенттер үйінде «Тұлғалық даму және ішкі үйлесім» тақырыбында мотивациялық тренинг ұйымдастырылды. Іс-шараны Менталды денсаулықты дамыту орталығының психологтары Ақбота Нұрланқызы мен Назерке Есенаманқызы жүргізді.

Тренингтің негізгі мақсаты – студенттердің өзін-өзі тану дағдыларын жетілдіру, ішкі үйлесім мен эмоционалды тұрақтылықты қалыптастыру, сондай-ақ тұлғалық өсу мен позитивті ойлау мәдениетін дамыту болды.

Шара барысында қатысушылар өмірлік құндылықтары мен басымдықтарын айқындап, тұлғалық дамуға жетелейтін мақсаттар жайлы ой бөлісті. Психологтар интерактивті жаттығулар мен өзін-өзі танытуға бағытталған ойындар ұйымдастырып, студенттерге өз «Менін» тереңірек түсінуге мүмкіндік берді.

Сонымен қатар мамандар эмоционалды тұрақтылықты сақтау, ішкі күйзелістерді еңсеру және позитивті өмірлік ұстанымды қалыптастырудың тиімді жолдары бойынша практикалық кеңестермен бөлісті.

Аталған тренинг БҰҰ-ның Тұрақты даму мақсаттарының бірі – ТДМ 3 «Денсаулық және амандық» бағыты аясында жүзеге асырылды.

2025 жылғы 29 қазан күні Қазақ ұлттық қыздар педагогикалық университетінің Менталды денсаулықты дамыту орталығы Филология институтының 1-курс студенттеріне арналған танымдық кездесу ұйымдастырды. 

Шараның негізгі мақсаты – жастардың рухани қауіпсіздігін нығайту және діни сауаттылығын арттыру болды.

Кездесу барысында Менталды денсаулықты дамыту орталығының теологы Исмаил Нурислам Оразалыұлы орталықтың негізгі қызмет бағыттарымен таныстырып, қазіргі діни ахуал және интернет кеңістігінде таралып жатқан радикалды идеологиялардың жастар санасына әсері туралы кеңінен әңгімеледі.

Сонымен қатар, кездесуге арнайы шақырылған Республикалық ақпараттық-түсіндіру тобының мүшесі, PhD докторант Қаражанов Нұрсұлтан Серікұлы дін мен дәстүрдің өзара байланысы, ұлттық құндылықтарды сақтау маңыздылығы және жалған діни ағымдардың қоғамға тигізетін кері әсері туралы нақты мысалдар келтіре отырып баяндама жасады.

Ол өз сөзінде діни сауаттылықтың жастар үшін маңызына ерекше тоқталып, студенттерді ақпаратты сын тұрғысынан қабылдауға және саналы көзқарас қалыптастыруға шақырды.

Кездесу соңында қатысушыларға «Діни қызмет және діни бірлестіктер туралы» Қазақстан Республикасының Заңының 7-бабы түсіндірілді. Аталған бапқа сәйкес, білім беру ұйымдарының аумағында және ғимараттарында діни рәсімдер мен жиналыстар өткізуге, сондай-ақ миссионерлік қызметті жүзеге асыруға тыйым салынатыны атап өтілді.

Іс-шара студенттердің рухани мәдениетін арттырып, дін мен дәстүр сабақтастығын түсінуге бағытталған мазмұнымен ерекшеленді.

Қазақ ұлттық қыздар педагогикалық университетінде «Студенттердің деструктивті мінез-құлқын алдын ала анықтау» тақырыбында эдвайзер-оқытушыларға арналған кездесу ұйымдастырылды.

Іс-шараны Менталды денсаулықты дамыту орталығының психотерапевті Раушан Бидалиевна Каримова және коуч-психолог Мусина Сара Смановна жүргізді.

Кездесудің негізгі мақсаты – эдвайзер-оқытушылардың студенттердің мінез-құлқындағы өзгерістерді ерте кезеңде анықтау, алдын алу шараларын ұйымдастыру және психологиялық қолдау көрсету дағдыларын жетілдіру болды.

Шара барысында маман студенттердің деструктивті мінез-құлқының негізгі себептері мен белгілерін талқылап, алдын алу бағытындағы тиімді әдістемелер мен психологиялық тәсілдерді таныстырды. Сонымен қатар қатысушылар нақты мысалдар арқылы тәжірибелік жаттығулар орындап, студенттермен тиімді коммуникация орнату жолдарын талқылады.

Психотерапевт эдвайзерлерге студенттердің эмоционалды жағдайын бақылау, сенімге негізделген қарым-қатынас орнату және қиындықтарды дер кезінде анықтау бойынша пайдалы кеңестер берді.

Аталған кездесу Біріккен Ұлттар Ұйымының Тұрақты даму мақсаттарының бірі – ТДМ 3: «Денсаулық және амандық» бағыты аясында жүзеге асырылды.

2025 жылғы 28 қазан күні Қазақ ұлттық қыздар педагогикалық университетінде жастардың діни сауаттылығын арттыруға бағытталған танымдық кездесу ұйымдастырылды. Іс-шараны Менталды денсаулықты дамыту орталығы Физика, математика және цифрлық технологиялар институтының 1-курс студенттері үшін өткізді.

Кездесуде орталықтың теологы Исмаил Нурислам Оразалыұлы жастарға орталықтың негізгі қызмет бағыттары туралы кеңінен айтып, қазіргі діни ахуал мен интернет кеңістігінде таралып жатқан радикалды идеологиялардың қауіптілігіне тоқталды. Сонымен қатар ол жастарды діни мәселелерге сындарлы көзқараспен қарауға, ақпаратты талдап қабылдауға және діни сауаттылықты арттырудың маңызын түсінуге шақырды.

Шараға Республикалық ақпараттық-түсіндіру тобының мүшесі, дінтанушы Әліп Тұрсынғали Төреғалиұлы арнайы қатысып, дін мен дәстүрдің өзара сабақтастығы, ұлттық құндылықтарды сақтау қажеттілігі және жалған діни ағымдардың қоғамға тигізетін кері әсері туралы мазмұнды дәріс оқыды. Ол студенттерге нақты мысалдар келтіре отырып, радикалды ағымдардың идеологиялық тәсілдері мен олардың алдын алу жолдарын түсіндірді.

Кездесу соңында қатысушыларға «Діни қызмет және діни бірлестіктер туралы» Қазақстан Республикасының Заңының 7-бабы түсіндірілді. Заңға сәйкес, білім беру ұйымдарының аумағында діни жиналыстар мен миссионерлік қызметке жол берілмейтіні атап өтілді.

Мұндай танымдық кездесулер жастардың рухани мәдениетін қалыптастыруға, діни сауаттылығын арттыруға және салауатты дүниетанымын нығайтуға ықпал етпек.

Қазақ ұлттық қыздар педагогикалық университетінде Алматы қаласы Жастар саясаты басқармасының өкілдері мен белсенді студенттердің кездесуі өтті.

Іс-шараға Алматы қаласы Жастар саясаты басқармасының Жастарды әлеуметтендіру және ақпараттық қамту бөлімінің басшысы Беккайров Нұрсұлтан Болатұлы және Алматы қаласы Жоғары оқу орындарымен жұмыс басқармасының басшысы Мұхтарұлы Нұрлан қатысты.

Кездесудің негізгі мақсаты – қала жастарына арналған жаңа жобалар мен мүмкіндіктер туралы ақпарат беру, сондай-ақ жастар бастамаларын қолдау болды.

Кездесу барысында қатысушыларға Алматы қаласының аудандық комьюнити орталықтарының қызметі, студенттердің жұмыспен қамтылуы, жұмысқа орналасу бағыттары және белсенді жастармен бірлесе жұмыс жүргізу мүмкіндіктері туралы егжей-тегжейлі мәлімет берілді.

Университет студенттері өз кезегінде жастар саясаты саласындағы сұрақтарын қойып, түрлі ұсыныстарын білдірді.

Мұндай кездесулер – жастар мен мемлекеттік құрылымдар арасындағы өзара байланыс пен ынтымақтастықты нығайтуға, студенттердің әлеуметтік белсенділігін арттыруға бағытталған маңызды қадам болып табылады.

2025 жылдың 23 қазанында Қазақ ұлттық қыздар педагогикалық университетінің №5 студенттер үйінде «Мотивация және жеке даму» тақырыбында тренинг ұйымдастырылды.

Іс-шараны Менталды денсаулықты дамыту орталығының психологтары Ақбота Нұрланқызы мен Назерке Есенаманқызы жүргізді.

Тренингтің негізгі мақсаты – студенттердің ішкі мотивациясын арттыру, мақсат қою және оған жету дағдыларын қалыптастыру, сондай-ақ өзін-өзі дамыту мен сенімділікті нығайту болды.

Шара барысында қатысушылар өздерінің жеке мақсаттарын айқындап, табысқа жету жолдарын талқылады. Психологтар түрлі мотивациялық ойындар мен тәжірибелік жаттығулар ұйымдастырып, студенттерге өз әлеуетін танып, өмірлік ұстанымдарын бекітуге мүмкіндік берді.

Сонымен қатар мамандар қатысушыларға мотивацияны арттыру, табандылық пен сенімділікті дамыту, қиындықтарды еңсеру жолдары бойынша пайдалы кеңестермен бөлісті.

Аталған шара БҰҰ-ның Тұрақты даму мақсаттарының бірі – ТДМ 3 «Денсаулық және амандық» бағыты аясында жүзеге асырылды.

Қазақ ұлттық қыздар педагогикалық университетінде 2025–2026 оқу жылында ақылы негізде білім алатын студенттерге оқу ақысына жеңілдіктер тағайындау жөніндегі Комиссияның отырысы өтті.

Комиссия жұмысы «Білім алушылардың оқу ақысына жеңілдіктер тағайындау туралы» Ережеге сәйкес ұйымдастырылды. Оның басты мақсаты – әлеуметтік санаттағы студенттерге қолдау көрсету, дарынды жастарды ынталандыру және білім алушылар контингентін тиімді қалыптастыру.

Отырыста студенттердің үлгерімі, әлеуметтік мәртебесі мен ұсынылған құжаттардың дұрыстығы жан-жақты қарастырылды. Комиссия шешіміне сәйкес, бір студентке бір уақытта тек бір ғана жеңілдік түрі беріледі.

Аталған бастама БҰҰ-ның Тұрақты даму мақсаттарының бірі – ТДМ 1: «Кедейлікті жою» бағытымен үндеседі.